السلام عليكم ورحمة الله وبركاته
بسم الله الرحمن الرحيم
سندريلا في ربوع نجد _ حكاية من التراث القديم..
** كان يامكان في قديم الزمان وفي سالف العصر والاوان.
_** كان هناك فتاة تدعى ارقية .. تتميز ارقية بجمال اخاذ فهي الاقل شطوبا بين زميلاتها وهي اكثرهم بياضا بالنسبة للركب واقلهم اصفرارا النسبة للاسنان.
** كانت تعيش سعيدة في منزلها_ مزرعتهم
وفي يوم من الايام راح ابوها يبي يجيب العلف من المزرعة حاول حمل حزمة العلف .. عندما رفعها وجد تحتها جنياً فبخ به (أي تفل على خشته) الجني فخر صريعا على خشته ......
لحــــــظة
هونت
امها ما ماتت أجل وشلون يصير لها مرة ابو؟؟ إذن فالذي راح للمزرعة ومات اكتشفنا انها امها لكن الترجمة لم تكن دقيقة
ماعلينا المهم..
** ماتت ام ارقية .. وشعرت بحزن غامر ماتدري وش اتسوي .. فتصافقت بها الجدران ...
جاء ابو ارقية لها وقال ارقية انا لازم اعرس .
ارقية : على راحتك يبة.
ابوها ..خلاص انا باخذ لطيفة ارملة ابو سعد.
قالت يبه بس هاذيس قشرا.
ابوها .. لا هذي اشاعات وبناتها مريم ومزنة بيصيرون مثل خواتك.
ارقية .. اللي تبي يبه
** تزوج ابو ارقية وبعد شهر من فلة الحجاج بدات مرة ابوها وبناتها تقل خاتمتهم وايحسرون بارقية.
ضاق صدر رقية وسكنوها في بيت الدرج .. والابو ماله سنع بينما لطيفة وبناتها ساكنين باحسن غرفة والتي تطل على حوش البقر <<< يحسون بالارتباط معهم.
** دارت الايام .. والا اليوم به حفلة في الخب الشمالي .. ..مسويها حاكم الخب من اجل انتقاء عروسا له.
** قعدت ارقية تصيح ودها تروح .. ومرت ابوها صاكتن عليها
*اطلعوا للحفلة واتركوها .. >>>بعد عمري والله
** يوم صار بالليل وتمر هذيك الفارة وتلحقها ارقية بالنعلة تبي تكتلها... اصرخت الفارة بقوة قائلة :
الفارة / اصبري وش بلاس انتي ماتقرين قصص.
ارقية / بلا قصص بلا هم هالحين ابلخس بهالنعله واطير راسك.
الفارة /وش بلاس انا فارة متجنسة <<< يعني فيها جني من اهل الارض.
ارقية / واذا صار يعني.
الفارة / انا راح اسوي لس الي تبين <<< اكيد لاحظتوا اللهجة
ارقية / وش بتسوين يعني
الفارة / مثل القصة اللي بالتلفزيون ابخليك كشخة وتروحين للحفلة.
ارقية / يالله ورين اذا انتي صاتزة.
الفارة / طيب جيبي لي عنز واربع دجاج مندي << خطا مطبعي. .. وقرعة نجدي واوريس.
راحت ارقية وجابت لها كل اللي تبي.
الفارة /// شرم برم لاتو فاتو جرام سرام ... يوم صارة القرعة كاديلاك وصارة العنز شغالة.. وصارة حدى الدجاج سواق ... عاد وباقي الدجاج مالهن سنع فاضبطوا عليهن كبسة
افرحت ارقية .. قالت الللللللله بس وشلون اروح وما عندي لبس.
قامت الفارة <<< نسينا انقول لكم ان الفارة تغير شكلها الى انسان
المهم قامت اسحرتها وحطت عليها ذاك اللبس :
التيور من آوت فيت <<< ماعليش دبة اشوي.
والجزمة من ميلانو.>>الله يعزكم
والشنطة فندي <<< اصلية مو تقليد طبعاً
والبوك جفنشي <<<< ماعليش مو زي الشنطة هذا المتوفر باسواق الجن.
** افرحت ارقية واركبت وراحت للحفلة.
** قالت الفارة لرقية اسمعي الساعه احدعش <<< على بالي أبغير الرقم ... لازم ترجعين والا تراني مانيب مسؤولة عن اللي بيصير.
* * جت ارقية للحفلة .. يوم الفتت ناظر كل الموجودين ادحيم واعليان واعزيز والبرهم كلهم فقوا اخششهم من الدهشه.
** الامير كان مستنزل <<< يطقون له طيران ...
قالت الجنية اللي مع ارقية للجني اللي في الامير : اطلع خل الامير يصحي
** نظر الامير الى ارقية مدهوشا
ماهذا الجمال اللي يشق الجبهه
** تبوسمت ارقية وقالت تسلم الله يخليك
الامير إحول وفقد التركيز.
قال ممكن ترقصين معي
ارقية : واخزياة والناس وش يقولون.
الامير : تكفين تراها قصة لاتخربينها.
ارقية خلاص تم.
** ارقصت ارقية مع الامير ونست الوقت.
مادرت الا المباراة اللي بالتلفزيون قاضية .. درت انها تاخرت.
كانت الساعة العاشرة وثمان وخمسون دقيقة .. طيط ..عند الاشارة << عفوا نسينا.
*المهم...
انقزت ارقية وراحت تركض واثرها لابسة الزبيرية حقت اخوها الصغير <<< انتبهوا للصغير... لان الجزمة اللي جابتها الجنية لها ضيقة عليها.
اركضت ارقية بالدرج .. وتنقطع الزبيرية وتطيح .. والامير يركض وراها ... تكرفس على جبهته وماقدر يلحقها .. اخذ الزبيرية معه ورجع.
** ارقية ارجعت لبيتهم وهي مبسوووووووطة.
الامير اعلن انه يبي يتزوج راعية الزبيرية ..
من بكرا انزلوا الحاشية يدورون راعية الزبيرية ... اكتشفوا ان نص أهل الخب الشمالي تركب عليهم اوالله البلشة <<< قالها الامير
جاب مستشاره وقال له وش الحل.
المستشار : ابد طال عمرك انشوف رجلين الحريم واللي مقاسها ست واربعين تراها هي
*** راحو يدورون ... اكتشفوا ان معظم بنات الديرة مقاسهن تسع واربعين وفوق.
** يوم اوصلوا بيت ارقية .. صكت عليها مرت الابو في بيت الدرج .. لم تسكت ارقية فبدت اتصارخ واتصيح افتحوووووووووولي ..
سمعها خوي الامير <<< المستشار.
قال جيبوها
قالوا هذي خبلة
قال ماهو شغلكم جيبوها ..
** جت ارقية والبست الزبيرية والا هي قدها تمااااام ... فرح الخوي وراح وبشر الامير.
** تزوج الامير ارقية .. وتهاوش معها عقب شهر وطلقها . <<< والله الخاتمة.
مما ورد نستفيد التالي :
1/ القرع له فوائد عديدة.
2/ ارقية شخصية مش خيالية.
3/ .. زين اذا كان انعال اخوك قدك.
4/..القرعة ممكن تتحول الى كاديلاك.
5/..اذا بغيت تعرس لاتاخذ وحدة شايفينها بعرس .. وحاول انك تشوفها في الوضع الطبيعي ..والا تراك تبي تطلقها .. الا اذا كانت مدرسة
6/ اسم سندريلا الحقيقي ارقية امااسم سندريلا مجرد نيك نيم
الإثنين نوفمبر 29, 2010 1:19 am
