اللـي بعـد ماغـاب عنـكـم بكـيـتــوه..!
ـــــ كـم صـار لـه مـعـكـم ولحـدٍ درابـه ..
ياليتـكـم ملتـوا عـلـيـه وسـألتـــوه ,,
ـــــ ســؤالكـم يمـكـن يغـيّـر جـــوابــه ..
لكـن خذيـتـوا كـل شـي وتركتـوه ,,
ـــــ لضيقـــتـة ولعـزلـتـه واغـتـرابـه ..
اليـوم بـس اليـوم يعـنــي فـقـدتــوه..!
ـــــ وهو له سنه من يوم ما اقفت ركابه ..
لو كان فيكم خير .. كنتوا ذكرتوه ,,
ـــــ قبل الزمن يسرق ملامح شبابه ..
يعني عشانه ما اشتكى .. ما سمعتوه ..!
ـــــ هذا الخطأ اللي ما حسبتوا حسابه ..
ما قد عرض شكواه حتى على أخوه ,,
ـــــ شلون اجل يشكي عليكم صوابه ؟
طبعه يموت ولا ألحق الغيم مشروه ,,
ـــــ عــزة ظـمـأ .. ولا مـذّلـة سحـابـه ؟
اقفى .. عساه مجار من كل مكروه ,,
ـــــ راسه عزيز .. وراس ماله ثيابه ..
وعفّة يديه اللي خذاها من أبوه ,,
ـــــ و صبره على جوعه وقلّة زهابه ..
خلّه يتوه بكيفه .. احسن ولا يتوه ,,
ـــــ بـ يدين ناسٍ شرعها شرع غابه ..
الذيب فيها من سلك درب مشبوه ,,
ـــــ واللي ما هو ذيبٍ كلته الذيابه..
يا ما أنبنى من حلم فينا وهدّوه ,,
ـــــ وقتٍ غريب وناسٍ أكثر غرابه ..
صدق القناعة كنز .. لكن هم أفنوه,,
ـــــ و حتى الأصابـع علمـوها تشابــه ..
ما دام صوتك من ورى الباب مسفوه ,,
ـــــ يا ريـح هـدّي باب مـن سـدّ بابــه ..
والصاحب اللي غاب لو هم تناسوه ,,
ـــــ قـولــي لـهـم لا يفـرحـون بغيابـه ..
هـم حصّـلوا في غيابه اللي تمـنّـوه ,,
ـــــ بس الوعد لا من برى من صوابه..
السبت ديسمبر 18, 2010 2:11 am
